18 Eylül 2021 Cumartesi 01:55
izmir marriot
izmir marriot

Este Pesah solos i sekos

Silvyo OVADYA Köşe Yazısı
31 Mart 2020 Salı

Eskrivi dos artikolos en el Şalom en turko para la fyesta de Pesah. En el primer artikolo eskrivi ke devemos de ser prontos para fyestar este Pesah solos en kaza. En esta fyesta lo ke me plaze lo mas muncho es ke mizmo en las kayes del kuartier ande moro se puede sintir ke es una fyesta Djudia. Ma este anyo va ser muy difisil para mozotros Djudios de Estanbol. Kada anyo mos arekojemos mas de 10 a 15 personas en una kaza. Ay syertos ke no meldan la Agada; ma son muy kontentes de toparsen len esta meza. La Komunidad Djudia de Turkiya - Estanbol - no es muy relijioza ma la mas grande partida mira a las tradisyones i a los uzos. Mizmo si no se van a la Keila diya de Pesah toman plazer de ordonar la meza de Pesah i de meldar la Agada todos endjuntos.

Eskrivyendo el artikolo en turko para el Şalom en primero echi un ojo en el internet, en el site de SEVIVON ke apartyene a la Komunidad Djudia para la edukasion de los mansevos i mizmo de la djente ke tyenen una sierta aedad. La persona se puede edukar toda su vida.

Si no savesh komo se aze el Haroset o el Tezpishti ya puedesh ambezarvos bushkando Sevivon i Pesah en el Google o Yahoo. Los ke son kargados de este sitio aparejaron un video kon el Rav Nafi Haleva para eksplikar a la djente komo se ordona la meza de Pesah. En un otro video estan kontando la Istoria de Pesah. Ya puedesh topar syertas kantikas de Pesah. Mizmo syertas kantikas komo “Ma Nishtana...” ke se topa en la Agada de Pesah. Ay mizmo un video sovre una pyesa de teatro. El video dalkavo es el livro de Agado ke fue publikado en 2003 por el Şalom. Si keresh meldar solo la Agada sin eksplikasyones empesash a meldar por la oja 23 del livro.

Kuando el Şalom publiko este livro avia demandado al Hazan Natan Siliki si puediya meldar la Agada en un studio para azer un CD. Acheto immediatamente i lo izimos. Reelmente preferava un CD ande un grupo de ombres estan meldando la Agada komo dizimos “Todos endjuntos”. Ma no pudimos realizar esto. Agora vemos ke no tenemos mas CDs de esta Agada. Bushkando en kaza topi uno deyo i les demandi a los responsavles si  puedian  publikar en el internet del Sevivon la Agada kantada. Ya se ke no es muy kasher. Ma kreo ke en estos diyas ande no puedemos mizmo meldar “Un Kadish” despues de un meldado esto no va ser un pekado muy importante.

Ay mas de dos semanas ke munchas personas no  salen de sus kazas. Este materyel va ser bastante para las famiyas ke tyenen la tradisyon de ir a sus paryentes. I este modo van a pueder ambezarsen syertas komidas i syertas kostumbres. Kreo ke los anyos ke vyenen vamos a pueder fiestar noches de Pesah kon muncho mas emosyon. 

Vos kero demandar otra koza sovre las Agadas de Pesah. El Museo Djudio de Turkiya pensa de realizar una ekspozisyon sovre las Agadas de Pesah ke se publikaron en el Impero Otomano. Pensamos si devemos de meter syertos egzempyos sovre las Agadas ke fueron publikadas en otros payizes. Kaminando i avlando vamos a ver. Si tenesh todo modo de Agadas ya puedesh embiyar por e-mail al mail: info@muze500.com o travar la foto i metyendo vuestro nombre embiyar al numero (0552)7321955 kon whatsapp.  Kreo ke va ser una ekspozisyon muy enteresante. Kon Agadas eskritas en letras ebraikas ma ke se melda en turko o Agadas asemejantes. Vos auguro una fyesta de Pesah en SALUD. Hag Pesah Sameah.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİNİZİ ÇEKEBİLİR

Şalom TV GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel