Ay dos semanas ke me vo uno o dos diyas al echo porke devemos de pagar muestras devdas, devemos de rekovdar lo ke tenemos de resivir. Devemos de pagar la mezada de los lavorantes. Devemos kontrolar los chekes ke se deven de pagar. Reelmente es una situasyon bastante yuch. Los otros diyas esto en kaza. No se estan eskapando los mesajes. Todo modo de mesajes. Dizen ke ay un konserto de Renan Koen i todos estan en el telefon mirando el konserto. Noche de alhad aviya en primero un chiko konserto kon syertas avlas de Karen Sarhon por la Komunidad Djudia de Madrid i despues en el facebook un konserto de İzzet Bana. Estava bueno ma no es mi preferensya de segir un konserto en un telefon i en no oyendo muy bien. Esto asperando los diyas ande vamos a pueder organisar syertos konsertos. Vos esto dando la palavra ke vamos a organisar un konserto kon las Estreyikas d’Estanbol en el Neve Şalom despues sus muevo CD. Kreyo ke va estar pronto en poko tyempo. Ya savesh puedeser ke fue un problem de dar konsertos en las sinagogas kon las mujeres, i esto es un problem muy emportante para mozotros; para el muzeo. Por esta razon devemos de eskojer lo ke devemos de azer.
Oy alhad a la tadre dizen ke ay el konserto de Andrea Bocelli. Es djusto ke vimos un otro konserto del mizmo artisto esta demanyana en la TV. Kreyo ke syertos rabinos tyenen una komunidad mas ancha en los medyos elektronikos, ke en la sinagoga. Toparon syertas aplikasyones ke se uza komo zoom o otras i estan azyendo la tefilla todos endjuntos.
Syendo en kaza vos konti la semana pasada ke estamos karishtreando todo lo ke se topa en el dip del baul. Esta demanyana topi una monton de fotografias de los anyos 1976 i 1977 ande los mansevos estan fotografiados despues del muzikal “Eshkoliot” i de la pyesa de teatro “Arabadaki Timsah / El Krokodil en la araba”. I empesi a enbiyar estas fotos a syertos amigos ke se topan en la foto. Todos muy kontentes de versen en las fotografias de 43/44 anyos de antes. Estavan kontentes porke paresiyan muncho mas mansevos/mansevas.
No se si vo lo konti; el anyo pasado una damma fondo una fondasyon para formar La Fondasyon del Teatro Turko; i el teatro Djudyo de Turkiya va topar lugar en el Muzeo ke van a formar. Reelmente los Djudios turkanos tyenen munchos artistos i tuvyeron en sus istoria munchas mansevas i mansevos ke tomaron lugar en las shenas. I İzzet Bana esta arekojyendo todos estos dokumentos i estas fotografias para posedar una arshiva en muestro muzeo i en el muzeo de la Fondasyon de Teatro. Munchas grasyas a todos ke se estan okupando para arekojer esto todo.
La semana pasada en el Şalom avia un haber sovre la muerte de tres Djudios de Korona; ma no es esto todo. Esta semana malorozamente tuvimos el triste haber de la muerte del famozo hazan de muestra komunidad el Sinyor Rıfat Romi. Era aedado de 63 anyos. Konti en turko munchas kozas sovre el. Lo puedesh meldar en las ojas en turko. Reelmente era un ombre de fey ke lavorava muncho. Era en mizmo tyempo shohet. I no se si savesh, los Djudios de muestra komunidad les plaze komer kodrero solo en Pesah. Por esta razon los shohetes lavoran muncho en estos diyas para kortar syenes de kodreros. I devo dizir ke no vos pareska ke todo lo ke kortan es kasher. De vez en kuando vemos ke sale solo dos vakas kasheres ente dyes o dodje deas. Esto kere dizir ke kortan dodje deyas para obtener dos kasheres. Rıfat Romi lavoro muncho para muestra Komunidad. Ke su alma repoze en Gan Eden.
Noche de shabat a las 10 de la noche en la televizyon disheron ke dyeron karar ke no vamos a pueder salir a las kayes despues de medianoche. I todos los inyorentes salyeron a las kayes para pueder merkar syertas kozas. Ke bovedad. Izyeron grande danyo. I todo lo ganado por el han merkado.
Espero ke vos va eskrivir la semana ke vyene kon muncho mas de esperansa.
