En el anyo 1858, el Papa era dainda konsiderado komo la mas alta otoridad en Italia. El reynava ainda enriva los mas grandes teritoryos de este payiz. En este mizmo anyo de 1858 fue fuyido en el medyo areskuridad de la noche, un ijiko judio de 6 anyos, por la polisiya del Papa, en la sivdad de Bolonya. El nombre de esta kriyatura era Edgardo Mortara, ijiko de una rika famiya judiya, donde kontaremos la trajika istorya.
Para entender este fakto kale avlar de lo ke reprezenta este evenimyento.
La governante katolika ke se okupava de Edgardo, lo aviya baptizado al ijiko en lo ke estava hazino en una balsa de luvya, sin ke lo sepan dingunos. I este fakto se lo konto a su papaz propio, ke lo transmetyo a un importante fonksyonaryo del Papa i deklaro ke esta kriyatura ke esta baptizada deve de ser engrandesida en la fey katolika i azerse un nazir katoliko (hermite). La guvernante de la famiya ya aviya penado de azer esto kon el ermano grande de Eduardo, ma no aviya parvenido. Kon su ayuda, el ijiko fue fuyido. I este fakto alevanto el mundo judio entero i mizmo la Evropa. Personajes emportantes judios demandaron el ayudo de personalidades evropeos. Napoleon III i el Rey Franz Joseph de Austria penaron para salvar este ijiko. Resivieron siempre un refuzo del Papa. Edgardo fue enserrado kon su guvernante en un monasterio de Bolonya, ande kontinuo su vida relijioza en la fey katolika.
En 1850, la Italia se libero del reyno del Papa i el payis se divizo en munchos estados. Edgardo fue transferado a Roma. Todos los esforsos de sus paryentes para salvarlo fueron en vano. Sir Moshe Montefiore el mizmo demando una entrevista kon el Papa, ke refuzo de resivirlo. Los jurnales del mundo entero eskrivieron artikolos de protestasyon, a los kualos el Papa respondyo ke esto es un fakto de prestijio papal.
En 1870 el reynado del Papa kayo i se reduizo al Vatikan solo. Las paredes del Ghetto kayeron i los judios ayegaron a todo modo de derecho sivil. Edgardo ke ya se aviya echo un mansevo de 18 anyos puediya tornar a su puevlo i a su famiya, ma el refuzo el kamino del judaizmo, sintyendose un miembro del orden Augustus. Mizmo se troko el Nombre de Edgardo a Pius, komo el nombre del Papa ke lo aviya fuyido de su famiya. Edgardo era un elemento emportante i de grande valor para la eglisiya. El konosiya 9 linguas, inkluido el ebreo. El era mandado en kada parte de la Evropa para avlar i alavar la fey del Kristianizmo. En 1878, mansevo de 26 anyos Edgardo se rankontro kon su famiya. Su padre ya aviya murido de la ansya. Su madre kon su ermano fueron resividos por un kristiyano verdadero ke miro mizmo de konvertirlos al kristiyanizmo, sin parvinir. El fue arepushado enteramente de su famiya. Edgardo bivio anyos largos i muryo en 1940 a la edad de 88 anyos, prove kon un servante kristiano en un monasterio.
Esta istorya aflako muncho la otoridad del Papa ke iva dizyendo i repetando “IJO MIYO, PAGI MUY KARO TU PREZENSYA, PEDRI UN REYNADO POR TI”.
Este evenimyento i otros evenimyentos semejantes de konvertir los judios al kristianizmo fue la okazyon de la fondasyon de la ALLIANCE ISRAELITE UNIVERSELLE (AIU)
Keridos amigos, esto fue el destino de Edgardo Mortara.
